تخاريف ما قبل الامتحانات

امتحانات نص السنة الأسبوع الجاي

ومطلوب مني اني الم المنهج في الأسبوع دا

وكل ما حد يشوفني يقولي الكلمة الأزلية اللي بكرهها

ذاااااااكري

زهقت بقا من الكلمة دي ..

دا غير اللي بشوفه في المدرسة

ومليش نفس افتح اي مادة

ولا فاهمة رياضيات ولا كيميا ولا فيزيا ولا حافظة أحياء

مش عارفة هدخل الامتحانات اصلا ازاي

لا ومطلوب مني اني اجيب مجموع

اتخنقت من كل حاجة

نفسي بقا اخلص الهم اللي انا فيه دا

مش عارفة اصلا ليه الهبل دا كله

عشان شهادة هعلقها

ولااقعد اقشر بطاطس عليها

..

نفس الناس اللي بيقولولي ذاكري بيقولولي الكلام اللي كرهته

"عايزين مجموع كبير" .. "ان شاء الله طب او هندسة او صيدلة او اسنان"

مش عايزين نطلع عن دول

دا ايه دا .. هو يعني اللي يدخل حاجة تانية يبقا كوخة !!

وكل ما حد يشوفني يقولي هااااااا ناوية على ايه

واقولهم مهو لو بكيفي كنت قعدت في بيتنا

هو المجموع اللي بينوي وهو اللي بيقرر
..


مش عارفة ايه فايدة الهبل اللي بناخده دا

الأحياء يقولي تركيب الصرصور .. ومش عارفة جناحه اللي فوق بيطير بيه

وجناحه التاني حاطه زينه ولا مش عارفة ايه

ورجله معرفش مسطحه وعاملة ازاي من فوق

ايه الهطل دا .. احنا هنستفيد ايه لما نعرف الكلام دا

احنا هنناسبه مثلا

اخره بياخد بالشبشب ولا بنبص على رجله ولا على ايده

وحتى لو معلومات مفيدة

بعد الامتحان ولا بنفتكر نص كلمة من كل دا
..

حاسة اني هروح الامتحان الاسبوع الجاي

اول امتحان فيزيا

هتنح كدا في الورقة شوية وافتكر اسمي

واكتبه واراجعه كويس لان اهم حاجة اسمي لو غلطت فيه ممكن ما اخدش درجة كل اللي هحله

وبعد كدا ابص على اول سؤال الاقيني مش عارفاه

انقل ع اللي بعده

مش فاكراه

اللي بعده احله وبعد ما اكتب الحل

اكتشف اني كاتبة اجابة غلط واشطب عليها

انقل ع المسائل

الاقي حاجات كدا اول مرة اشوفها وكلام غريب

ومطاليب اغرب

اروح فاتحة على اول صفحة خالص

اللي بيكون فيها الارشادات

واقعد اقرا الارشادات كويس .. بيكونوا كاتبين حاجات مهمة

زي مثلا ان لو اخترت اجابتين هيتحسب السؤال كله غلط

وان انا لازم مضيعش وقتي واحل علطول

و..الخ بقا

بعد دراسة الارشادات بعناية تامة

ايوا طبعا الناس بتستهون بالورقة دي .. لكن دي اهم ورقة وممكن تكون الاجابة مضمنة فيها .. طبعا

ابص بقا في الساعة الاقي باقي ربع ساعة مش لازم اوتر نفسي وابص تاني ع المسائل والحاجات اللي تعقد دي

اقلب الورقة على ضهرها واحط القلم اللي متكتبش بيه غير اسمي

واقعد باصة في الساعة عشان اعرف الوقت هيخلص امتى

واستنى لما يلموا الورق

..
يا سلاااام مفيش احلى من كدا امتحان

دا بالنسبة للفيزيا اما الأحياء مش عارفة حاسة اني مش هحل كويس زي الفيزيا كدا

لاني اظن اني مش هفتكر اسمي بالكامل

بس سهلة معايا كرنيه فيه اسمي هغشه منه ..

..

المدونة بصيت عليها من أولها لآخرها لقيت كل بوست بيكون عن المدرسة :D

ما شاء الله بقيت حاسة اني حياتي = مدرسة

حاجة تزهق وربنا
..

خرفت بسبب الثانوية العامة :( :(

..

اي حد يقرا التخريف دا يدعيلي
:'(

حسبي الله ونعم الوكيل

حسبي الله ونعم الوكيل فيكي

مش مسامحة في حقي ابدا

ولو ما اخدتش منك حقي في الدنيا

هاخده منك يوم الدين

الاحساس بالظلم وحش حتى لو كان في حاجة بسيطة ..

ورجعنا تاني .. وسنة كئيبة -عفوا جديدة-

سنة جديدة هتبدأ في المدرسة

مليئة بكم هائل من المذاكرة والامتحانات .. والخناق مع المدرسات والطالبات

ضغووط في البيت عشان أجيب أعلى الدرجات ..

احساسي بيقولي ان السنة دي مش هتعدي على خير

بالذات ان التنسيق بتاع الكويت في مصر كان أعلى من أي سنة مضت

الناس اللي كانوا داخلين على اساس هندسة وصيدلة

جالهم حقوق وتجارة ..

يلا .. مش فارقة كتير .. أنا أصلا بفكر اخلص ثانوية واقعد في بيتنا :D

أهو اخلص من المذاكرة .. وأشوفلي حاجة مفيدة أعملها :P

..

سنة جديدة هتبدأ .. معلقين في المدرسة ورقة مكتوب عليها السلام باليد فقط او تقريبا حتى ممنوع السلام باليد

عشان الانفلونزا يعني اي حد هيسلم عليا هقوله .. "من بعييييييييد" أهو نخلص بردو من كتر السلام

تقريبا بنسلم على المدرسة كلها في أول يوم دا

..

سنة جديدة مليئة بالذل من المدرسات بالدرجات

وانواع الغش في الامتحانات ..

وانواع الافتكاسات في الامتحانات

اعتقد -اغلب- المدرسين بإمكانهم وبكل جدارة تأليف كتب .. بعض من عناوينهم

"كيف تسقط طالب في الامتحان"

و"تعلم آلية تعقيد الطلاب .. في ساعتين"

"التفنن في اختراع اخطاء للطالب حتى لا يحصل على درجات كاملة"

"اذلال الطلبة بدون معلم"

"كيف تنفسين عن غضبك من زوجك في طالباتك "

الكتب دي لو اتعملت ونشرت .. هتكون من أنجح الكتب

وهتكون مفيدة جدا للمدرسين الجدد في المهنة الشريفة

..

سنة جديدة مليئة بالنشاط والهمة - في البداية بس - وبعد كدا يحل علينا الاحباط واللامبالاة

ونرجع ااااااخر مكان ف الفصل .. ونحط رجل على رجل .. وننفض للي بتقوله المدرسة .. ونهز الكرسي لورا وقدام كدا ..
ونقول بعض من المقولات العظيمة ..

"ما كله محصل بعضه " .. "معادتش فارقة" .. "زي ما تيجي " .. "يااه امتى نخلص" .. الخ

..

مش مصدقة بجد اني باقيلي سنة واحدة ولما حد يجيبلي سيرة عن المدرسة أقول

يعني ايه مدرسة؟!! .. اه المكان الكئيب المليان ناس شريرين .. لالا خلاص مش هروحه تاني

امتى اخلص بقااااااااا ..

-_-

نهاية نملة :D

كانت السيدة نملة في رحلة بحث عن طعام لنملياتها(ولادها يعني :D) الصغيرات
فذهبت لشاطئ البحر علها تجد ما تطعمه لصغيراتها

..
وإذا فجأةً وهي تمشي على شاطئ البحر وجدت جزء من الكنز .. أعني من الطعام :D
فأخذت القطعة التي وجدتها .. وعلمت ان تلك القطعة لابد لها من مصدر

..

عزمت على إيجاد مصدر هذا الطعام .. فوجدت ان مصدره بقعة الماء الكبيرة تلك
ولكن ما لم تعلمه تلك النملة انها كانت بصدد الدخول الى البحر
لم تفكر كثيرا في عواقب دخولها الى هناك .. كل ما كان يشغلها هو الوصول الى مصدر الطعام
..
وكما توقعنا كانت نهايتها بمجرد دخولها للبحر ..

وتوتة توتة :D

..

النملة دي مماتتش على فكرة :D (او ع الاقل مماتش ساعتها)

بس السيناريو بتاعي :D

..

الصور دي وصور كتير غيرها صورتها في البحر بكاميرتي

بس كاميرتي كانت نهايتها قريبة من نهاية النملة

بعد ما صورت بيها صور كتييير

وقعت ووقعت الكاميرا معايا .. واكسرت .. وكلي أمل انها ينفع تتصلح

...

وكل عاام وانتم بخير ورمضان كريم

لو سمحت يا دكتور .. سيب ضرسي في حاله..

ايام الامتحانات كنت قاعدة في امان الله بذاكر فيزيا .. وروحي طالعة ..

كالعادة سهرانة ومش باقي ع الامتحان غير ساعتين


ماسكة ورق امتحانات .. تقضية واجب مش أكتر ..

واذا بألم فظيع في ضرسي .. عملت نفسي مش واخدة بالي

بس الألم مش واقف عند ضرسي دا امتد لودني .. آه والله ودني

طبعا مكانش في حل غير اني افضل باصة للورق اللي انا مش فاهمة هو بيتكلم عن ايه دا عشان انسى وجع الضرس

لكن الألم كان أكبر من انه يتنسي ..

قلبت البيت .. قلتلهم مش هأعرف احل ف الامتحان وهو ضرسي بيوجعني

اهي حجة والسلام عل وعسى .. يقولولي نأجله ولا حاجة

طبعا قوبلت بالتريقة عليا .. ومعلش استحملي

واول ما هتشوفي ورقة الامتحان هتنسي

رحت الامتحان وفعلا كان لورقة امتحان الفيزيا تأثر كالسحر .. نسيت الوجع خالص

..

طبعا اتفقت مع ماما أول ما اخلص امتحانات هروح للدكتور عشان اشوف ضرسي .. هه آل يعني

خلصت الامتحانات ونسيت انو عندي ضرس أساسا
..

ومرت الأيام ..

واذا في يوم مشرق من أيام الأجازة السعيدة .. وانا بتصفح النت .. نفس الضرس رجع يوجعني تاني

بس كان بيوجعني جامد .. تقريبا كنت بعيط للناس في الماسنجر .. وع الفيس بوك

اضطررت اني اكلم بابا واقوله عايزة أروح للدكتور اليوم

قررنا اني اخيرا هروح للدكتور ..

دخلت بقا .. قعدت استنا دوري ..

وجنبي اتنين ستات مش يعرفوا بعض تقريبا

بس كالعادة اتعرفوا على بعض في جزء من الثانية .. وبدأت واحدة فيهم تحكي للتانية

قصة حياة أسنانها .. وازاي انها وهي صغيرة راحت للدكتور مش عارفة مين ..

وكمان لما كانت في مصر اسنانها عملت ايه ..

وعملوا مقارنة بين دكاترة مصر ودكاترة الكويت ..

وكم أن النظام وحش ومحتاج تعديل ..

والذي منه ..

غصبن عني سمعت الحديث بتاعهم دا ..

..

المهم بعد ساعات من الانتظار والترقب ..

اخيرا دخلت للدكتور .. وياللهول بكره عيادات الاسنان ..

المهم الدكتور شاورلي على كرسي الاعدام ..

قعدت ع الكرسي .. الدكتور قعد يشوف ضرسي كدا ..

ممم .. ممم هو وجع امتى ؟

قلتلو وجع ايام الامتحانات ووجعني كمان اليوم ..

قالي آه دا باينو عصب ..

وياللهول كم كنت أدعي انه يطلع مش عصب ..

قالي اعملي اشعة عشان نشوف ..

رحت عشان أعمل الأشعة .. وانا أصلا من ساعة ما دخلت للدكتور وانا بترعش وشكلي مرعوبة

(وكانت وحدة صحبتي حكيتلي انها لما حشت عصب بؤها فضل مفتوح ومش اتقفل .. وبالعافية لما اتقفل)

وحكاوي كدا مرعبة عن العصب

المهم اللي بيعمل الأشعة قاللي مالك كدا خايفة ليه ..

وكنت حاكية لماما حكاية صحبتي دي ..

راحت قالتلو أصل وحدة صحبتها بؤها ما اتقفلش

الراجل فهم ان صحبتي بؤها متقفلش بعد الأشعة

قعد يضحك عليا وقاللي صحبتك بتضحك عليكي .. دي شافتها في التلفزيون ولا ايه

وانا كنت خلاص هولع فيه ..

لما طلعنا قلتلها ايه يا ماما دا بتضحكي الناس عليا .. :@

قالتلي هو اللي فهم غلط ..

المهم رجعنا للدكتور وقعد يتفحص الأشعة .. وقالي دا هيتحشي عصب

وانا اصلا كنت بدعي من الصبح انه يطلع مش عصب

قلتله عــــــــصب !! .. قالي لو مش عايزة ممكن نخلعه

ماما قالتله لا هتحشي عصب ..

المهم الدكتور شاورلي تاني على كرسي الاعدام ..

ومسك الابرة اللي طولها مترين دي .. وراح مدخلها في بؤي

وما اكتفاش بكدا .. لا راح جاب واحدة تانية وحطها في بؤي ..

وبعد كدا بقا جه بالكونترا البتاعة اللي بتعمل (ززززززززززز) دي ..

ودي أنا بكرهها .. ومهما حطلي حقن بنج لازم توجعني ..

قعد ينخربلي بيها في ضرسي .. وانا نفسي أشيلها بأي طريقة

واصبر نفسي واقول اهو هيشيلها .. بس هو بيشيلها ويرجع يحطها تاني

وبعد معاناة خلاني اقوم من على كرسي الاعدام .. وقالي انو كدا حشى مؤقت بس ..

ولسة هاجي تاني عشان أحشي عصب ..

..

روحت البيت وقعدت عملت بحث ع النت عن حشو العصب
(اللي اكتشفت بعد كدا انه مش مستاهل كل دا)

واكتشفت انهم بيحطوا بلونة في بؤ العيان .. آه بلونة لونها أخضر

وبعد ما سألت أخويا ..

وسألت ذوي الخبرة اللي حشوا عصب قبل كدا

المهم طمنوني اني مش هحس بحاجة ..

ودي شكة أبرة .. والكلام دا

بس في بنوتة صغيرة حشت عصب قبل كدا

حكيتلي على المعاناة اللي قابلتها

وازاي انها عيطت وهم بيحشولها ..

..

وجه اليوم المرتقب يوم حشو العصب

وقبل ما نروح قعدت اتفرج على ضرسي في المراية

قلت لماما على فكرة الحشو المؤقت دا مش وحش

مهو ماشي حاله أهو

ايه رأيك نوفر المشوار وبلاش من حشو العصب دا

..

وماما بتاخدني على قد عقلي (بكل ما تحمله الكلمة من معنى) :@

كنت عايزة انام قبل موعد الدكتور شوية

اللي هو 4:30

بس طبعا مقدرتش أنام وقضيتها نت

لغاية ما جت الساعة 4

ورحنا بقا للدكتور

لما وصلنا كانت الساعة لسة 4:25

فضلت مستنية على أعصابي

بيفرق معايا كتير اذا كان دكتور أو دكتورة

المهم قعدت مستنية والساعة مش راضية تمشي

ومر الوقت ببطء جدا

وحانت اللحظة

..

ماما دخلت الأول وانا وراها

واذا بالمفاجأة .. الدكتور هندي .. ربنا يستر

قلت لماما .. الحقي دا الدكتور هندي .. انا مش عايزة

قالتلي مالو يعني الهندي الشفاء بيد الله ..

قلتلها عارفة يا ماما .. بس دا ممكن يكون مش مسلم

وكمان الممرضة هندية

..

يعني كمان لما يكلموا انا مش هفهم هم بيقولو ايه

الدكتور قال مين اللي هيحشي ضرسه ..

وانا مستهبلة وساكتة :D

المهم ماما قالتله يعني اني انا ..

راح قال لماما انها لازم تستنى برا ..

وانا ببصلها وهي ماشية

(عاااااااااااايزة ماااااامااااااااااا) دا في سري يعني لم أجرؤ اني اقولها بصوت عالي

ولكن على مين .. ماما قالتلي انا مستنية برا

وصرت في غرفة مغلقة مع الدكتور والممرضة .. وكرسي الاعدام

وكالعادة .. استغرقت في أحلام اليقظة

الدكتور طلع رجل شرير .. والممرضة كمان شريرة

وكانوا متفقين عليا .. والأدوات دي مش أدوات دكاترة

دي أسلحة .. مشين جن وار بي جي .. والذي منه

وهياخدوني رهينة وهيطلبوا فيا فدية

والدكتور بيضحك ضحكته الشريرة نياهاهاها

..

بس لما رجعت لأرض الواقع

حسيت انهم طيبين شوية .. شوية بس

قعدت على كرسي الاعدام .. وبدأ الدكتور في استخدام ادواته العجيبة

وكل اللي بيطلبه من الممرضة يأما بالهندي يأما بالانجليزي الهندي

وفي كلتا الحالتين انا عاملة زي البلهاء ومش فاهمة حاجة

..

شيئا فشيئا اتضح ان الدكتور بيتكلم انجليزي هندي

بس لو ركزت معاه هفهم شوية

المهم دار هذا الحوار بينهم

him : so do u have any relatives here

her : yes my brother is here

him: did he come first?

her: no i came first

him : really .. mmm and where does he work

her : قالت كلمة معرفتش أفهمها :d

him : mmm i see .. the place here so strange u know
(وكان بيبص حواليه كدا في العيادة )

انا بقا : نعم ياخويا المكان هنا غريب .. دا أول مرة يجي هنا ..
دا باينو أول مرة يشتغل عصب .. الله يرحمك يا ضرسي العزيز
دا كان بردو في سري عشاني كنت فاتحة بؤي ال يعني لو مش فاتحة بؤي كان مش هيكون في سري .. المهم

her : yes .. it's not like it was there

وفجأتن جاب حاجات كدا زي ما تكون مسامير والله أعلم .. وقعد يحطهم في ضرسي

كل دا وانا بعترف يعني اني مكنتش حاسة بألم .. تقريبا عشان كنت متابعة حديثهم المشوق

بس فجأتن وجعنيييييييي وكان الوجع قادم من أعماق ضرسي

راح قالي

if u feel pain raise ur hand

اللي فهمته اني ارفع ايدي لو حسيت بألم

طبعا مكملش كلمته دي رحت رفعت ايدي

راح حطلي حقنة بينج كمان .. على أساس اني ناقصة

وكمل المسامير بتعته دي ..

وكمل حديثه مع الممرضة

وفهمت انه تقريبا جاي قريب من الهند قريب او من مكان ما يعني

وهو في خضم عمله .. قاللي
u can swallow .. no problem

ولتاني مرة .. نعـــم نو بروبليم ابلع ايه بس

ايه هو دا .. انا حرة مش عايزة ابلع الحاجات دي

ودا كان في سري بردو لنفس الأسباب

عملت فيها الهبلة وهزيت راسي بالإيجاب على أساس ماشي يعني

الممرضة تحسبني مش فاهمة .. قالتلي انت ممكن يبلع عادي

يادي النيلة خلاص يا حجة مش عايزة أبلع

المهم لقوا مفيش فايدة سكتوا .. وكملوا لعب في ضرسي

ويشيل المسامير ويحط حاجات تانية كدا غريبة .. وتقريبا كان بيجرب الأدوات اللي عنده

مسابش حاجة إلا وحطها على ضرسي ..

كل دا وانا أحلامي العبيطة خلتني حسيت انو بيعملي في ضرس سليم .. وكنت خايفة ليكون عملها بجد

لأن الجزء اللي بيشتغل فيه متبنج وانا مش حاسة هو في أي ضرس بالظبط

..

بعد معاناة دامت حوالي 45 دقيقة

راح الدكتور قام ف انا بحسب انو خلاص وقايمة انا كمان

راح قاللي

no wait a few minutes more .. pls

رجعت مكاني تاني على مضض

المهم قعد كمل الحاجات العجيبة اللي بيحطها في بؤي دي

..

واخيرا قام تاني مرة .. وانا مرضتش اقوم تاني عشان مش يقولي لا لسة شوية

بس فهمت انو كدا خلاص ..

المهم قاللي اني اروح أعمل اشعة تاني

رحت عملت الأشعة ورجعتله

قعد يكلم كدا مدة

وانا بصاله نظرة بلهاااااء لأبعد الحدود

بيكلم هندي وربنا ..

راح قاللي

don't u understand english?

me : yes :D

راح رجع يكلم انجليزي تاني ولكن براحة شوية وخفف اللهجة الهندية

him : I will give u this medicine but only take it if u feel pain

me : only when i feel pain .. ok

him : and u will come after "tendays"
آخر كلمة دي كان بيقولها بسرعة جدا وبطريقة مش مفهومة

رجعت لنفس النظرة البلهاء تاني :D

him : tendays ten days
قالها تاني عدل بقا

me : yeaaaa 10 days .. ok (with a wide smile )

him : laughing

he said : u don't come here after 10 days
go to the clinic that u went to first

me : but I came here not another clinic

him : no no not here

وكان بيشاورلي على الغرفة اللي جنبه

me: yea .. u mean to the other room .. other doctor

him : yes yes i mean the other room ..

me : okay .. thank u

him : any time

وطلعت من عندهم على غير العادة وابتسامة عريضة لا تفارقني

وحكيت لماما كل اللي حصل .. ونسيت أصلا ضرسي واللي حصله

..

بس روحت البيت وجيت هنا لمدونة العزيزة أحكيلها على يومي مع دكتور الأسنان

وانا بكتب تحت تأثير البنج على فكرة :D

ما زلت أتنفس !!

يااه .. صارلي مدة مكتبتش هنا

انا بفتحها دايما ومتابعة ..


لكن من ساعة ما أخدت الأجازة وحاسة اني مش قادرة أكتب حاجة

كتبت كذا بوست .. لكن منشرتش حاجة ..

..

طبعا آخر يوم امتحانات كان يوم لايوصف .. كنت مبسوطة جدا ..


يمكن أكتر سنة اكون مبسوطة كدا اني خلصت

خلصت سنة حادي عشر السنة الكئيبة دي .. باقي سنة واحدة بس واخلص خالص ..

كانت أسوأ سنة فعلا مرت عليا .. نفسيا .. دراسيا .. كل حاجة ..

يارب بس تكون السنة الجاية سنة كويسة وتعدي على خير ..

نتيجتي ظهرت ..

طبعا مش اللي كان نفسي فيه .. بس الحمدلله .. عموما يعني النتيجة دي مأثرتش أوي عليا

فرحتي اني خلصت السنة دي غطت على أي حاجة ممكن تزعلني ..

وتقريبا أهلي أول مرة يحسوا قد ايه أنا محتاجة أرتاح شوية من الكلمتين بتوع كل سنة ..

"مش مستواكي" .. "مبتذاكريش" .. "كنا متوقعين منك أكتر" .. "عايزين السنة الجاية أحسن من كدا" .. الخ
..



وانا فاتحة النت وبشوف نتائج الثانوية العامة .. وبشوف الناس اللي أعرفهم .. واللي مجاميعهم كويسة

ماما قالتلي عقبالك كدا ..

كلمتها خليتني نطيت بأفكاري واحلام اليقظة بتعتي ..

و انا فاتحة موقع النتيجة ونتيجتي ظهرت ..

ياااااااااه نجحت .. ومجموعي كويس يدخلني كلية كويسة

اهلي مبسوطين بيا .. مفيش حد بيعاتبني زي كل سنة ويقولي انتي السبب انتي اللي مش بتذاكري ..

زمايلي كلهم نجحوا ومجاميعهم حلوة ..

كلنا بنهني بعض ومبسوطين .. مفيش حد زعلان .. النتائج جت أفضل من المتوقع ..

بس رجعت تاني لأرض الواقع ..

قلت لماما وتعبيرات وشي كلها احباط .. يا ماما أنا لو نجحت السنة الجاية هيكون كويس ..

حاسة ان السنة دي استنفدت طاقتي .. صرت خلاص غير قابلة للمذاكرة ..

انا كنت مش بذاكر كويس طبعا وكنت بستهبل كتير ..
بس بردو تعبت جدا .. وحسيت اني مش مظلومة في النتيجة بل بالعكس كان المفروض أقل أكتر ..


..
الأجازة السنادي غيير عن كل أجازة ..

مش زي كل سنة نوم ونت وخلاص..

لأ أنا بعمل حاجة مفيدة ودي حاجة رافعة جدا من معنوياتي ..

مش حاسة بملل كل أجازة .. بالعكس الايام دي مش عندي وقت الحق أقول فيه مليت من الأجازة ..

حاسة ان الأجازة بتمر بسرعة .. حاجات كتير عايزة أعملها لكن حاسة اني مش هلحق ..

مش مستعدة خالص للسنة الجاية ..

ولو بإيدي كنت كملت شوية في الأجازة عشان أكون قادرة أكمل السنة الجاية..


..

أجازة من النت..

السلام عليكم


بابا قرر يديني أجازة من النت لحين انتهاء الامتحانات


امانة كل اللي يشوف البوست دا يدعيلي

..

وان شاء الله يوم 25-6 هرجع تاني